Joh 8 | NdeIBE | STEP | Kodwa uJesu waya eNtabeni Yama-Oliva.

John 8

Owesifazana Owabanjwa Ephinga

1 Kodwa uJesu waya eNtabeni Yama-Oliva.

2 Kwathi kusisa wabonakala njalo egcekeni lethempeli, abantu bonke babuthana kuye, wahlala phansi wabafundisa. 3 Abafundisi bomthetho labaFarisi baletha owesifazana owayebanjwe ephinga. Bammisa phambi kwabantu 4 bathi kuJesu, “Mfundisi, owesifazana lo ukhandwe ephakathi kwakho ukuphinga.

5 EMthethweni uMosi wasilaya ukuthi abesifazana abanjalo kabakhandwe ngamatshe. Manje wena uthini?” 6 Umbuzo lo wawungumjibila wabo ukuze bazuze izaba lokumbeka icala. Kodwa uJesu wakhothama waseloba phansi ngomunwe. 7 Kwathi ngoba belokhu bephikelela ngokumbuza walulama wathi kubo, “Nxa ekhona phakathi kwenu ongelasono kaqalise lowo ukuphosa ilitshe.” 8 Waphinda wakhothama waloba phansi emhlabathini.

9 Esetsho lokho labo abezwayo baqalisa ukunyomuka ngamunye bahamba, kuqalisa ngabadala bakhona, kwaze kwasala uJesu yedwa lowesifazana lowo elokhu emi khonapho. 10 UJesu walulama wambuza wathi, “Mama, kanti sebeye ngaphi? Kasekho yini okwethesa icala?”

11 “Kakuselamuntu, mnumzana,” kulandula owesifazana. “Lami-ke kangikulahli,” kusitsho uJesu. “Zihambele, kodwa ungaphindi wenze isono njalo.”

Ubuqotho Bobufakazi BukaJesu

12 Kwathi uJesu esekhuluma ebantwini njalo wathi, “Ngiyikukhanya komhlaba. Loba ngubani ongilandelayo kasoze ahambe ebumnyameni lanini, kodwa uzakuba lokukhanya kokuphila.”

13 AbaFarisi bahle bamqaga bathi, “Nanko-ke, wena uyazifakazela; ubufakazi bakho kabulaqiniso.”

14 UJesu waphendula wathi, “Lokuba ngizifakazela mina, ubufakazi bami buqinisile ngokuba ngiyakwazi lapho engavela khona lalapho engiya khona. Kodwa lina kumnyama nje kini ukuthi ngivela ngaphi lokuthi ngiya ngaphi.

15 Lina lahlulela ngendlela yabantu; mina kangahluleli muntu. 16 Kodwa ngithi nxa ngingehlulela, izinqumo zami zilungile ngokuba kangingedwa. Ngimi loBaba ongithumileyo.

17 Emthethweni wenu kulotshiwe ukuthi ubufakazi babantu ababili buqinisile. 18 Yimi ngokwami engizifakazelayo; omunye ufakazi wami nguye ongithumileyo – uBaba.”

19 Base bembuza besithi, “Ungaphi uyihlo?” UJesu waphendula wathi, “Kalingazi mina kanye loBaba. Aluba belingazi, belizamazi loBaba njalo.” 20 Wawakhuluma amazwi la efundisa egcekeni lethempeli eduze lalapho okwakubekwa khona iminikelo. Kodwa kakho owambambayo ngokuba isikhathi sakhe sasingakafiki.

21 Waphinda njalo uJesu wathi kubo, “Ngiyasuka lapha, futhi lizangidinga kodwa lizafela esonweni senu. Lapho engiya khona lingeke lize khona.”

22 AbaJuda basebebuzana bathi, “Uzazibulala yini? Yikho yini esithi, ‘Lapho engiya khona lingeke lize khona lina’?”

23 Kodwa waqhubeka wathi, “Lina lingabalapha phansi; mina ngivela ngaphezulu. Lingabomhlaba; kangisuye owalo umhlaba.

24 Ngilitshelile ukuthi lizafela ezonweni zenu; uma lingakholwa ukuthi nginguye engithi nginguye, ngempela lizafela ezonweni zenu.”

25 Bambuza bathi, “Lapha uvele ungubani konje?” UJesu waphendula wathi, “Khonokho ebengivele ngikutsho sonke lesi isikhathi.

26 Kunengi engilakho ukukutsho ngilahlulela. Kodwa lowo ongithumileyo uthembekile, njalo lokho engikuzwileyo kusuka kuye ngikutshela umhlaba.”

27 Kabazange bezwisise ukuthi wayebatshela ngoYise. 28 Ngakho uJesu wasesithi, “Lapho seliyiphakamisile iNdodana yoMuntu lizakwazi ukuthi ngingubani lokuthi kangenzi lutho ngokwami, kodwa ngikhuluma kuphela lokho uBaba angifundise khona. 29 Lowo ongithumileyo ulami; kangitshiyanga ngingedwa, ngoba ngihlezi ngisenza lokho okumthokozisayo.” 30 Wathi esakhuluma lokhu abanengi bakholwa kuye.

Abantwana Baka-Abhrahama

31 UJesu wathi kubaJuda abamkholwayo, “Uma libambelela emfundisweni yami lingabafundi bami ngempela. 32 Ngakho lizalazi iqiniso, njalo iqiniso lizalikhulula.”

33 Bamphendula bathi, “Siyinzalo ka-Abhrahama futhi kasizange lanini sibe yizigqili zamuntu. Ukutsho kanjani pho ukuthi sizakhululwa?”

34 UJesu waphendula wathi, “Ngiqinisile ngithi wonke owenza isono uyisigqili sesono. 35 Phela isigqili kasilandawo emiyo emulini, kodwa oyindodana ungowakhona lanininini. 36 Ngakho uba iNdodana ilikhulula, lizakhululeka ngempela.

37 Ngiyakwazi ukuthi lingabosendo luka-Abhrahama. Kodwa selizimisele ukungibulala ngokuba ilizwi lami kalilandawo kini. 38 Ngilitshela lokho engikubonileyo phambi kukaBaba, kodwa lina lenza lokho elikuzwileyo ngoyihlo.”

39 Baphendula bathi, “U-Abhrahama nguye ubaba.” UJesu wathi, “Aluba belingabantwana baka-Abhrahama ngabe lenza izinto ezenziwa nguye u-Abhrahama. 40 Kodwa kunje nje lizimisele ukungibulala, mina umuntu oselitshele iqiniso engilizwileyo livela kuNkulunkulu. U-Abhrahama kazenzanga izinto ezinjalo. 41 Lenza izinto ezenziwa ngowenu uyihlo.” Bamvukela bathi, “Kasisibobantwana abazuzwa ngobufebe thina. UBaba esilaye kuphela nguNkulunkulu ngokwakhe.”

Abantwana BakaSathane

42 UJesu wathi kubo, “Aluba uNkulunkulu ubenguYihlo, belizangithanda, ngoba ngavela kuNkulunkulu, okwamanje sengilapha. Kangizizelanga; kodwa wangithuma. 43 Kungani lingaluzwisisi ulimi engilukhulumayo na? Ngokuba liyehluleka ukuzwa engikutshoyo.

44 Lingabakayihlo, uSathane, ngakho lifuna ukusenza isifiso sikayihlo. Wavele waba ngumbulali mdabuko wakhe, kazema eqinisweni, ngokuba uvele engelalo iqiniso. Uthi nxa ewaqamba amanga, akhulume ulimi lomdabuko wakhe ngokuba ungusomangase loyise wamanga.

45 Kodwa kalingikholwa ngokuba ngilitshela iqiniso! 46 Ukhona na kini ongaveza ukuthi ngilecala lesono? Aluba ngikhuluma iqiniso, kungani lingangikholwa na? 47 Lowo ongoka-Nkulunkulu uyakuzwa lokho uNkulunkulu akutshoyo. Isizatho sokuthi lingezwa siyikuthi kalisibo bakaNkulunkulu.”

UJesu Akutshoyo Ngaye

48 AbaJuda baphendula bathi, “Siyalahleka yini nxa sisithi ungumSamariya njalo ulamadimoni?”

49 UJesu wathi, “Kangiladimoni mina, kodwa ngidumisa uBaba ikanti lina liyangigcona.

50 Kangizidingeli udumo mina; kodwa ukhona olufunayo, yena ungumahluleli. 51 Ngiyaqinisa ngithi, nxa umuntu egcina ilizwi lami kasoze akubone ukufa lanini.”

52 Besizwa lokhu abaJuda bababaza bathi, “Khathesi sesisazi ukuthi uledimoni! UAbhrahama wafa kanye labo abaphrofethi, kodwa wena uthi nxa umuntu egcina ilizwi lakho, kasoze akuzwe ukufa lanini. 53 Wena umkhulu kulobaba u-Abhrahama na? Wafa, kanye labo abaphrofethi. Wena uzenza ubani na?”

54 UJesu waphendula wathi, “Uma ngizidumisa mina ngokwami, luyize udumo lwami. UBaba, elithi unguNkulunkulu wenu nguye ongidumisayo.

55 Lokuba lina lingamazi, mina ngiyamazi. Aluba bengingathi kangimazi, bengizabe ngingumqambi wamanga njengani, kodwa ngiyamazi njalo ngiyaligcina ilizwi lakhe. 56 Uyihlo u-Abhrahama wathakazelela umnakano wokulubona usuku lwami; walubona wathokoza.”

57 AbaJuda bathi kuye, “Kawukafikisi iminyaka engamatshumi amahlanu obudala, kodwa uthi usumbonile u-Abhrahama!”

58 UJesu waphendula wathi, “Ngilitshela iqiniso ukuthi u-Abhrahama engakabi khona, Mina Ngikhona!” 59 Besizwa lokhu badobha amatshe befuna ukumkhanda, kodwa uJesu wasithela, waphunyuka wasuka emagumeni ethempeli.